Vorið má fara að koma.

  Jæja þá er maður orðinn árinu eldri og ég fékk það í afmælisgjöf sem ég vildi....rigningu !

Ég vona að hún taki allan snjóinn. Ég vil fá vorið.

  

Órjúfanlegir vinir.

Set hér inn mynd af bestu vinum í heimi. Melkorka og afi.

  

Hrekkjusvín

Þeir sem þekkja manninn minn vita það með vissu að hann er með afbrigðum hrekkjóttur.
Oftar en ekki, hefur betri helmingur hans orðið hvað oftast orðið fyrir þessum hrekkjum hans.
Ég læt hér flakka einn hrekk sem gerðist þegar að við bjuggum í Ártúnsholtinu.
 
                     *************************************************
Ekkert þótti mér betra en rauður ópal. Ég gat gúffað í mig fleiri fleiri pökkum á dag, ef því var að skipta. Ég var svo sólgin í rauðan ópal að ég gat stundum hvolft hálfum pakka upp í mig í einu og gerði það bara þannig að ég opnaði pakkann og hvolfdi upp í mig góðgætinu og maulaði.

Ég ætla að taka það fram áður en sagan hefst, að ég hef séð illa frá 14 ára aldri og nota oftast gleraugu, þó ekki alltaf. (og ekki í þetta sinn)

Nú...eitt sinn kemur minn elskulegi eiginmaður heim af fótboltaæfingu, sem var daglegur viðburður í þá daga eftir vinnu.
Hann heilsar krakkakrílunum sem hann átti þarna úti á götu og kemur svo inn til spúsu sinnar. Hengir upp jakkann sinn, kyssir sína beint á snúðinn og réttir henni...

.......rauðan ópal !

Æ...en hvað þú ert sætur ástin mín, segi ég. Kaupir þú bara rauðan ópal handa mér bara si svona án þess að ég biðji þig um það ? ha ?

Já, ég kom við í sjoppunni að kaupa mér að drekka og ákvað að kaupa handa þér ópal elskan í leiðinni af því þér finnst hann svo góður.
Svo fer hann að sinna öðru. (en fylgist með mér í laumi)

Fíkillinn opnar pakkan, sér samt að það er búið að opna hann, en reiknar með að viðhengið hafi fengið sér smakk áður en gefið var, en hugsa svo ekki meira út í það.
Pakkanum er hvolft að venju upp í gímaldið og byrjað að bruða...umm...

**?????=ÖÖ??'_$$%$##%&%&%/&//**  piffff...skyrp.......hvur djöfullinn er þetta ?

Ég skyrpti innihaldi munnsins í lófann á mér hið snarasta og horfði forviða á það sem við mér blasti.

Hvað haldið þið að maðurinn hafi verið að dúlla sér við þegar að hann var að heilsa upp á krakkaormana sína úti á plani ??? ef hann var þá að heilsa upp á þá.....

HANN VAR AÐ TÝNA MÖL Í ÓPALPAKKA !!! JÁ, MÖL !!!

Það gat ekki verið að hann væri svona elskulegur nema að það væri hrekkur á bak við elskulegheitin.
Hann hafði fundið tóman ópalpakka í bílnum og ákvað að smella smá möl í hann handa sinni og sjá hvað gerðist. (þvílíkt hugmyndaflug)

Það skal tekið fram að hann andaðist næstum því það skiptið úr hlátri og hann hlær ennþá af svipnum á mér...yfir gleðinni...gleraugnalausri...full trausts á eiginmanninum, skella í mig rauða ópalnum.
Svipnum þegar að ég finn harða steinana gæla harkalega við tennur mínar og skyrpa þeim með hraði í lófann...og drápssvipnum sem hann fékk þegar að frúin uppgötvar að þetta var möl .... MÖL....

Ég hef aldrei treyst honum síðan þegar hann gefur mér nammi, sérstaklega ekki ef ég er gleraugnalaus.

Það þarf vart að taka það fram að hann var tekinn og laminn og ég réði við hann því hann var svo máttlaus af hlátri. 

                                 

Bless Bingi minn

 

Starfið sem Bingi minn unni,

stuggurinn stendur um það.

Hann hættir með óbragð í munni,

framtíðin óskrifað blað.

Ég er hér....

Gleðilegt ár allir nær og fjær.

Ekki hef ég nú verið dugleg að blogga hér undanfarið. Satt best að segja hef ég ekki punktað eitt einasta orð síðan töluverðu fyrir jól.

Nú liggur maður bara í kvefpest og hnerrar út í eitt. Ég fékk þessa dásemd um helgina. Það gat nú ekki verið að maður slyppi við allt. Fékk reyndar ælupest milli jóla og nýárs og var það ekki skemmtilegt.

En þessa dagana liggur maður bara í jólabókunum.

Var að klára bókina "Aska" eftir Yrsu Sigurðardóttir.

Ég verð að segja það að þessi bók er ekki alveg eins spennandi og ég hélt. Hún kom mér á óvart. Fannst vanta eitthvað, sérstaklega í endinn. Eins og það vantaði að klára að gera upp hluti sem komu fram í bókinni og maður hélt að maður fengi einhver svör við síðar í bókinni..... en nei, maður fékk ekki svörin við því .

Jæja, en núna er ég byrjuð á "Harðskafa" eftir Arnald Indriðason og vona að hún verði betri.

Ég á nú reyndar von á því. Arnaldur klikkar yfirleitt ekki.

Best að skella sér í lestur.

 

Jólakveðja

                 

    Gleðileg jól
                Hittumst aftur hress og kát á nýju bloggári.
                                          

                                                      Kveðja....Binna 

                                        

 

Nokkuð til í þessu

Ég fékk þetta sent í gær og langar endilega að deila þessu með ykkur.

Þetta ætti sennilega að vera límt á spegilinn á baðinu
hjá   þér þar sem þú getur lesið þetta á hverjum degi.
Þú gerir þér kannski ekki  grein fyrir því en þetta er 100% satt!

1.    Það eru að minnsta kosti tvær manneskjur í þessum
heimi sem þú myndir deyja fyrir.

2.    Það eru að minnsta kosti 15 manns í þessum heimi
sem elska þig á einhvern hátt.

3.    Eina ástæðan fyrir því að einhver hati þig er,
viðkomandi vill  vera eins og þú.

4.   Bros frá þér getur fært einhverjum hamingju,
jafnvel þótt viðkomandi líki ekki við þig.

5.   Á hverju kvöldi, hugsar einhver til þín áður en
viðkomandi fer  að sofa

6.   Þú ert himinn og jörð hjá einhverjum.
   
7.   Þú ert einstök og sérstök í þessum heimi

8.   Einhver sem þú þekkir ekki, elskar þig.
    
9.   Jafnvel þegar þú klúðrar málunum, verður eitthvað
gott úr því.

10.  Þegar þér finnst heimurinn hafa snúið í þig baki,
líttu aftur á.

11.  Mundu alltaf eftir hrósum sem þú færð.
Gleymdu dónalegum hreitum.


Mundu.........þegar lífið afhendir þér sítrónu /lime...
biddu þá um Tequila og salt .

Ég er hérna ennþá... :)

                       

Í gær var pabbi minn jarðsettur í kyrrþey. Hann óskaði eftir því sjálfur.
Ekkert tilstand, engin fyrirhöfn...þannig var hann allt sitt líf. Vildi aldrei láta hafa neitt fyrir sér. Hann vildi varla kalla í hjúkkurnar því hann vildi ekki "trufla" þær við störf sín :)

Jarðaförin var yndisleg í alla staði. Falleg tónlist og ekki þarf að spyrja af Páli Rósinkrans sem er svo ofboðslega mikill fagmaður að það er unun að horfa á og hlusta. Hann söng lag sem að pabbi gerði fyrir einum 50 árum síðan og ég gerði textann fyrir u.þ.b. 3 árum síðan.

Palli hafði hlustað á þetta lag einu sinni og æfði það svo klukkutímanum fyrir jarðaför, með Tóta píanógúrú og Matta fiðlustrák.
Lagið kom óaðfinnanlegt út úr barka þessa snillings. Ég varð agndofa.

Palli söng líka lagið ...Í bljúgri bæn... sem er með fallegri lögum sem ég hef heyrt.
Ég get til að mynda aldrei sungið það sjálf án þessa að fara að grenja. Mér er það lífsins ómögulegt. Ég hef oft reynt það en aldrei tekist.

Það er annað lag sem hrærir mig svona líka og ég hef aldrei getað hlustað á það né sungið án þess að fá kökk í hálsinn eða tár í auga og er það lagið...Það er eins og gerst hafi í gær...með Guðmundi Jónssyni. Gamalt lag, þar sem að pabbinn er að syngja um stúlkuna sína, frá því að hún er lítil hnáta og þar til hún sjálf verður foreldri. Dásamlegt lag sem grætir kellinguna alltaf !

Já og jæja. Ég ætla að bregða mér af bæ á morgun og skella mér til hennar Stínu vinkonu minnar og þar ætlum við St. John´s skvísur að hittast og skrifa saman jólakort til vina okkar á Nfl.
Við ætlum líka að borða saman sjálfdauða trönuþurrkaða "rollu" sem að Stína keypti. (niðurskorna) Gamlan sauð sem hún fékk líka á góðum prís. Svo legg ég sjálf til grafið unglamb... og þessu gúffum við í okkur með ristuðu brauði, ostum, sultutauji og rauðum legi.

Hafið það gott um helgina elskurnar.

                          

Í jólabúninginn

Ég hef ekki verið neitt sérlega dugleg við að blogga hérna undanfarið.

Þið verðið nú að fyrirgefa mér það, þar sem ég nota þessa síðu sem aukasíðu

en geri út aðra em mitt aðal bloggsvæði.

En ég var að spá í að prufa að setja þessa síðu mína í smá jólabúning og breyta henni í rautt.

Er það ekki bara alveg brilliant að gera það ?

 

Nú styttist í Canada ferðina mína.

Það er bara næstkomandi miðvikudag sem frúin hendir sér upp í flugleiðavél og skellir sér

í jólainnkaupin á erlendri grund.

Það verður nú ekki leiðinlegt skal ég segja ykkur. Gaman að geta breytt um umhvefi í nokkra daga, verslað og farið fínt út að borða og haft það huggulegt. Ég hlakka mikið til.

En nóg í bili.

Hafið það gott.

 

Frekar sloj dagur...en það lagast.

                                               
Dagurinn byrjaði svona hjá mér. 

Koddinn fyrir andlitið og ég hreinlega var ekki að meika það að drattast fram úr bælinu.

Hausverkur, beinverkir, slappleiki og flökurleiki. Allt í einum pakka og kostaði ekki eina krónu !!!  Von var á 5 sprellfjörugum krakkagrísum...svo þetta gat ekki verið betra !  

Dásemndin helltist yfir mig í gær þegar að frúin var að skella á afmælistertur fyrir húsbóndann. Eugh... En frúin er annálaður harðjaxl. Það er meðfæddur eiginleiki að bíta  bara á jaxlinn og klára dæmið  Ég ræð bara ekkert við það að vera svona mikill víkingur.

Jæja, en allavega er ég búin að vera í þokkalegri leti...sko bloggleti. Hef ekki nennt að ljúga neinu að ykkur elskurnar undanfarið, en ætla að reyna það í dag.

Bjarki Freysinn minn kom í hádeginu til ömmu sín þar sem að það er frí í leikskólanum. Odda mín er akkúrat í þessum töluðu orðum að koma sínum kalli á óvart. Fyrirfram afmælisglaðningur handa Nóa. Hann á afmæli á sunnudaginn 11 nóv.
Hún sækir hann í vinnuna og þau ætla að eiga góðan dag saman bara tvö...reyndar með litla laumufarþegann innanborðs  Hann er þriðji maður í boðinu.

Pabbi minn var sóttur í dag kl. 11 og fluttur á líknadeildina í Kópavogi aftur. Hann er orðinn það slappur að hann getur ekki verið heima. Hann þarf svo mikla hjálp.
Núna er ekki víst að hann komi heim aftur. Það eru meiri líkur á því en hinu.
Ég held að hann hafi alveg gert sér grein fyrir því sjálfur þegar að hann yfirgaf heimilið sitt í morgun. Æ...þetta er svo erfitt og sorglegt að horfa upp á sína í svona aðstöðu

Helgin verður tekin á rólegu nótunum hér á bæ. Tærnar upp í loft og þannig verða þær ALLA helgina. Ég ætla að ná þessari dásemdar lumbru úr mér.

ÖÖÖ....reyndar er ég að ljúga aðeins núna, þar sem að ég ætla í Bænagönguna á morgun kl. 14.00. Þetta er ganga sem er farin frá Hallgrímskirkju og níður á Austurvöll.
Gengið er gegn myrkrinu. Öllu því myrkri sem getur verið í fjölskyldum...t.d. sorg, veikindum, drykkju, geðveiki, þunglyndi, eiturlyfjum og svo lengi mætti telja.
Öllu því sem að stuðlar að myrkri í lífi hvers og eins.

Síðan verður beðið fyrir öllu því fólki sem er í myrkri, að það megi finna ljósið.
Finna lausn, frið og gleði.
Ef heilsan mín verður sómasamleg...þá fer jaxlinn í gönguna !!!

Ég hvet ykkur hin endilega að gera hið sama.
Kl. 18.00 verða svo gospel tónleikar í Laugardalshöllinni. Allt frítt.
Ég veit ekki hvort ég fer þangað. Sé til með það.

Hafið það gott kæru vinir....og spáið endilega í Bænagönguna. Ég hef mikið að þakka. Það hafa ótrúlegir hlutir verið að gerast í okkar fjölskyldu. Svo ótrúlegir að ég hélt að ég myndi ekki fá að lifa það að sjá þá gerast.
Þeir sem eru okkur næstir vita um hvað ég er að tala.
Þetta má ég svo sannarlega þakka og ég lofa hvern þann dag sem ég horfi á gangandi kraftaverkið mitt glaðan og heilbrigðan

Þrátt fyrir sorgina hjá okkur, þá er líka mikil gleði að gerast. Eins og sagt er...sorgin og gleðin eru systur, og ferðast saman í gegnum lífið.
Þannig er það nú bara.

Góða helgi.